Urteak dira Errekaleorreko auzo elkarteak auzoaren egoera -izaera marjinala eta oso kalitate txarreko etxebizitzak zituen auzo baztertua- salatu zuela. Hori ikusita, auzoa eraisteko plana adostu zela, bertako biztanleak beste nonbait birkokatzeko konpromisoarekin. Erdian krisia eta batzuen utzikeriagatik, eta beste batzuen errekurtsoengatik, egungo egoeran gaude.

Gure planteamendua argia izan da. Errekaleor eraitsi, lur horiek desklasifikatu, lurzoru urbanizaezina bilakarazi eta lur horiek Basaldea proiektuan integratu.

Basaldea proiektua ekintza multzo bat da, tokiko nekazaritza ekologikoa sustatzeko helburua duena.

Planteamendu honen inguruan ia erabateko adostasuna zegoen, harik eta 2013an gazte batzuek Errekaleor 26 okupatu eta egungo dinamika abian jarri arte.

Ordutik EH Bilduk etengabeko harremana eta komunikazioa izan du Errekaleorreko gazteekin, eta bai Osoko Bilkuran, bai Ensanche 21n zera planteatu dugu:

1. Elkarrizketa irekitzea Errekaleorreko okupekin euren proiektua ezagutzeko eta Errekaleorrerako aurreikusita zeukaten planekin uztartzeko aukerak aztertzeko.
2. Bitartean, bertan bizi diren lagunei bertako etxebizitzen erabilera prekarioa baimentzea.
3. Udalak arazoa ez judizializatzea eta jarduera errepresibo orori uko egitea.

Beraz, elkarrizketa prozesu honen ondorioz Errekaleorreko plangintza birmoldatu liteke edota bertako gazteen proiektua udalerriko beste eremu batean, beti ere era adostuan, kokatzeko erabakia hartu.