Kaixo, Mikel. Eskuartean daukadan informazioaren arabera, gaur egun ez dago Gipuzkoan frackinga bultzatzeko inongo proiektu ez eta asmorik ere. Jakingo duzunez, aurreko urteko maiatzean, Eusko Legebiltzarrak gasa frackingaren bidez esploratu eta ustiatzeko tekniketan bost urteko luzamendua ezartzea proposatzen zuen EAJ-PNVren emendakina onartu zuen. Horrez gain, Eusko Jaurlaritzaren baitan batzorde zientifiko independentea eratzea proposatu genuen, teknikaren eboluzioa aztertu eta teknikaren eboluzioaren berri emateko. Modu horretan, haustura hidraulikoaren teknika eta teknika berrien inguruko azterketa hobea egin ahal izango da.